Bis zur Fasnacht 2018 gohts no:



Countdown
abgelaufen

Fasnachtsgedicht  von Dario Schafroth (Santa Barbara,  17.02.2006)

 s wetter isch trüb, es isch ziemli chüehl,

bim bankverein kämpf i mi durs gwüehl,

i lauf zum münster ufe, i lauf ganz gschwind,

dur diä leeri gass bloss dr chalti wind,

dr rugge duet chli weh, trotzdem hani nüt zklage,

mini todmüede bei düen mich immer no trage.

 

am egge vo dr chille stön es paar bekannti gstalte,

uf em platz duet sich e laternepracht entfalte.

nochemene chline rundgang isch es denn sowit,

i freu mi wiä es chlises chind, es isch wieder zit.

nebenä tüüfel und en waggis reih ich mich ii,

ich wött i dem moment nienet anderst meh sii.

 

i zieh mini schlegel us dr kostümstäsche,

leer no schnell mini kaufti goggi-fläsche,

larve ah, drummle richte, ich stand bereit,

wart nur no uf d lisette wo dr marsch aseit.

mit em nunnefurz in schnelle schritt ziehn mr los,

... es tönt eifach wieder emol grandios.

 

denn tueni alli sorgä vergesse und au s geld,

ich tauch ab in mini bezaubernd schöni fasnachtswelt.

wiä imene märli ziehn gstalte vor mine augelöcher durä,

harlekin, alfträngg oder au hiend mit grossä schnurrä.

dr bode isch wunderschön farbig, konfetti überall

und dur d gasse klingt en fasnächtliche schall...

 

plötzli simmer denn ällei, wiit und breit

das isch dr moment wo mr e pfyffer-solo aseit.

i watschle wie im traum dä pfiffer hindä dri,

vorne diä himmlische tön, rechts dr schöni rhy.

es tönt guet ich bechumm fast ä gänsehut,

nur d glöggeli vo dr simi sin eifach z lut.

 

denn rötze mir mit emenä tamboure-solo richtig steinä,

zur "big mamma" und dä grosse pizza, denä feinä.

ha nach 100 fettige dominos fast scho vergessä,

wie schöns isch mit eu dört gueti pizza z essä.

i muess zuä geh au wenn i do statt fröstle duä schwitzä,

i dem moment würd i gern mit dä wurlis am tisch sitzä.

 

 

jo jetzt bliibt mr nümm meh als eu adieu z sägä,

i hoff dir heits guet und es git kei regä.

düent doch einisch mol ganz fest an mich denkä,

und eis vo eune ründeli em arme schöfli schenkä.

so jetzt gang i, tschüss, ciao und ufwiederseh,

i ha grad ziemli starks FASNACHTSWEEEH....